武洛个客人

【文、圖／鍾榮富／南臺科技大學應用英語系講座教授】

 

　　講起南部客人，大家就會想著六堆。愐著六堆，所有个文獻就單淨講新埤、佳冬、萬巒、竹田、內埔、麟洛、長治、高樹、美濃、六龜等鄉鎮，往往無人將里港个武洛(客話喊到「武鹿」[vu luk])算在內，故所到今還有盡多客人毋知武洛係客人盡重要个所在。如今回首來看，武洛在客人歷史上扮演成家、散播、傳承、開創个角色。

　　盡早時，平埔族已經有武洛部落个紀錄。早期个台灣文獻，安到武洛社。武洛地形重要，東片接近太武山，故所有盡多耕地值得開墾，不過山上有原住民，主要係排灣族。武洛社又係平埔族个居地。頭擺漢人侵入台灣，武洛係重要據點，這就係武洛第一个角色。另外，武洛就在武洛溪河脣。武洛溪係高屏溪个支流，源頭在大路關南片个南勢(今安到南華)同仕絨交接个所在。武洛溪沖出一大片个平原，適合耕種，但係平埔族人口毋多，耕作力有限，一大片个地方都係荒地。客家先賢進入武洛以後，難免會同平埔族爭土地、爭水源、爭歇个位所。客人初入台灣，愛先有家，後來正有力量向四方散播，武洛就有這種重要性。

　　大約在康熙年間，來自蕉嶺、五華、梅縣嵩山堡等地區个客人，沿等東港溪來到武洛，看著荒地一大片，就想辦法留下來開墾，自然引起平埔族个反對，雙方就恁仔交戰不休。到乾隆時期，可能客人个勢力增加，武洛社个馬卡道平埔族遷徙去泰山(迦納埔)，武洛變哪客人个大本營。後來，武洛人漸漸向北開墾，故所今下个戴興村，頭擺就安到「大武洛」。不過，武洛人增多以後，還係愛向外發展，有兜搬去大路關，有兜一路向北開墾今晡日个美濃。

　　武洛原本有上武洛同下武洛兩庄頭，人口上千，不過慢慢仔搬出去另外開墾新耕地，故所河洛人慢慢仔入來。如今武洛無辦法成庄，變哪茄苳村个一個小社區。茄苳村多數為河洛人，武洛在莊頭个南片，目前有五個鄰，137戶，大約有450個人，年齡45歲以上个武洛人普遍還會講客，不過河洛話漸漸仔變做社區語言。除了榕樹下、福安宮前共下尞个老人家，大部分人都改講河洛話。五六十歲个人，愛堵著人講客話，正會用客話回答。武洛客家話像大路關腔，名詞結尾用[i]，比論講「凳子」、「店仔」，而且無「身」、「新」之別，兩個都讀[sin]。

　　近年來有心人士意識著客人同客家文化个重要，積極成立社區發展協會，設立圖書館，教細人仔講客話。另外，協會盡力爭取多方面个經費，推動講客話運動，同時推行在地產業特色，製作客家文化意象。係你有來屏東尞，行入武洛社區，會鼻著濃濃个客家味緒。
　　
（四縣腔） 鍾榮富教授 聲檔 － 武洛个客人





　

▲BACK